Ættarmót 28.- 30. júlí 2006

Takk fyrir helgina !

Tue, 08 Aug 2006 23:56:12 GMT

Nefndin hefur nú pústað eilítið síðan ættaramótshelgina og viljum við þakka ykkur öllum fyrir hreint út sagt frábæra helgi á “þúfunni” okkar á Norðurfiðri á Ströndum.

Það er ekki laust við að ákveðin söknuður fylli sálu okkar þegar hugsað er til þess að nú sé mótið yfirstaðið og okkar skemmtilegu nefndarfundir og ofurútformaða og útpælda skipulagning liðin undir lok. Það er þó ákveðin sálarfriðun að allir í “stórfjölskyldunni” virðast vera í sæluvímu með ættarmótið og við erum einnig ofursátt með hvernig til tóks enda sýndu ættingjar og veðurguðirnir okkur sitt besta andlit norður á Ströndum.

Við ættarmótsnefndin viljum koma á framfæri þökkum til allra ofurduglegra ættingja sem veittu okkur aðstoð við undirbúning og framkvæmd á hinu og þessu í tengslum við ættarmótið en í mörg horn var að líta en eins og við var að búast voru alltaf einhverjir reiðubúnir að leggja hönd á plóg. Við viljum þakka : rollugrindarhreinsitæknum, skreytingar og ljósaaðstoðarmönnum, borðaburðarmönnum, brennusöfnurum og brennuhleðslumönnum, traktorsstjórnendum, brennustjórum, galdrakerlingum og körlum, blómsveigahönnuðum, sundleikastjórnendum, fótboltafrömuðum, gróðursetjurum, Norðurfjarðarsystkinunum fyrir göngu um Norðurfjörð, trillu og gúmmíbátastjórnendum, handsnyrtum, sandkastalaumsjónarmönnum og dómurum, andlitsmálurum, eldspúurum, grillgerðarmönnum og grillurum, sósu og salataðstoðarmönnum, kjötskurðarmönnum, gítaristum, skúrurum og ruslakerrukörlum að ótöldum öllum skemmtikröftunum sem fram komu á aðalkvöldinu.

Við nefndin viljum þakka kærlega fyrir okkur og æðisgengna samveru á þessu fyrsta ættarmóti Sveinbjörns Valgeirssonar og Sigurrósar Jónsdóttur. Nefndin hefur þó ekki sungið sitt síðasta og mega ættingjar vænta óvæntrar uppákomu að hálfu nefndarinnar á næstkomandi “jólaballi” en við höfum enn ýmislegt óklárað í farteskinu s.s. myndasýningu og kynningu á sigurvegurum í keppninni um “ mestu ófarirnar norður á Strandir ” svo og keppnina um "mestu ófarirnar suður af Ströndum "

Ljósmyndasöfnum frá ættarmótinu er hafin og nú þegar eru ljósmyndir Marellu og Valgeirs aðgengilegar á heimasíðunni og fleiri myndir eru væntanlegar. Sendið okkur ykkar bestu myndir af ættarmótshelginni eða “netlink”. Enn og aftur takk fyrir frábæra helgi kæru ættingjar og vinir. Kveðja Ættarmótsnefndin.

Af ferðalöngum !

Thu, 27 Jul 2006 00:10:15 GMT

Frést hefur af ferðum Gests og Kiddý en þau lögðu af stað norður upp úr hádegi í dag. Símhringing barst frá þá þeim hjúum þaðan sem þau voru stödd á Djúpuvík í kvöld en sprungið hafði á hjólbörðum farartækisins !

Haldið ykkur nú….því það hafði sprungið fimm sinnum á leiðinni ! Tvisvar á bílnum og þrisvar á fellihýsinu. Þau hjúin sögðu farir sínar ekki sléttar en veðja á aðra ferðalanga að gera betur en þau Gestur og Kiddý þykja sigurstrangleg í keppninni um “ mestu ófarirnar á leiðinni norður”

Dagskrá ættarmóts í Norðurfirði.

Thu, 20 Jul 2006 23:44:58 GMT

Dagskrá ættarmóts á Valgeirsstöðum.

Dagana 28. – 30. júlí 2006

Föstudagskvöld 28.júlí

Kl 21:00 Ryðgaðar rennireiðar og rollukerrur ! Rúntað um með börnin í firðinum í boði okkar frábæra frændfólks á Krossnesi

Kl 22:00 Fjörubrenna og kvöldvaka í Norðurfjarðarfjörunni. Hér er ætlað að hita upp raddböndin. Við tökum allavegana lagið “ það brugga allir landa upp til Stranda”

Laugardagur 29.júlí

Kl 13:00 Ættarmótið formlega sett á bæjarhlaðinu. Hópmyndataka m.m. Hér er um algera skyldumætingu að ræða – myndatökur og mótssetning er ekkert til að grínast með

Kl 14:00 Göngutúr um æskuslóðir og síkjasull með Norðurfjarðar –systkinunum Norðurfjarðarsystkinin lokka okkur inn töfra Norðurfjarðar og bestu lækjalontustaðirnir teknir út

Kl 16:00 Sandkastalasmíðar og ýmsar uppákomur í Norðurfjarðarfjörunni Ofurfóstra tekur völdin í fjörunni. Aðrar uppákomur í höndum hinna og þessa.

Kl 17:00 Kveikt í grillinu og sameiginlegt borðhald undirbúið Hér verður skipað í grill og salat flokka. Sósumeistarinn sýnir listir sínar í eldhúsinu.

Kl 19:00 Valgeirsstaðarveisla hefst í fjárhúsunum Ljúffengur matur að hætti Norðurfjarðardætranna Heiðu og Völlu.

Kl 20:30 Skemmtidagskrá hefst með fjölmörgum uppákomum ættarinnar Frábær skemmtidagskrá í smíðum að hætti dætra og sona Norðurfjarðar. Skipulagning í traustum höndum Valgarðs skólara og Huldu Primadonnu .

Kl 23:00 Rollugrinda -dansleikur hefst í fjárhúsunum Hér mun eiginlegt rollugrindar og ættarþol fara fram. Magnað stuð fram á morgun

Sunnudagur 30 júlí Engin skipulögð dagskrá. Endalausir möguleikar til að eyða deginum í sveitinni en ættarmótsnefndin mælir með: fyrirþáallrahraustustugangaátöflukálfatindeðanaustvíkurskörðogsvofyrirþessa nokkuðhraustaþámælumviðmeðgönguáhyrnueðaþórðarhellifyrirframlágaþáer tilvaliðaðheimsækjakörtsemersmartogskemmtilegtsafníárnesieðagangaað kistuvogigjánniþarsemgaldramennhreppsinsvorubrenndirá17öldjáeðafaraútá fellogskröltauppádalogsjáútsýniðútádrangaoghendastumífellseinstíginueðabara aðkeyrainningólfsfjörðogefþangaðerkomiðþvíekkiaðfaraallaleiðinníófeigsfjörð þarsemaðvegakerfiðendarogþarmeðendisiðmenningarinnareðaþáaðfaraíheitapottinná gjögrienmaðurveitekkiafþessumpottifyrrenþaðblasirviðmanniskyltisemsegirað maðurmegiekkifaraípottinneðabaraaðfaraeinhverjajeppavegiútíafdaljáogsvo erþaðfúluvíkinsemenginhefurnokkurntímanstígiðfætiíallaveganaekkitiláljósmyndog síðastenekkisístogeiginlegafremstokkareinasannakrossneslaugsemerbara himnaríkiájörðuallafheitogljúf.

1000 heimsóknir á heimasíðuna !

Tue, 18 Jul 2006 01:05:42 GMT

Heimsóknir á síðuna eru nú komnar í 1000. Þetta er merkur áfangi og viljum við ættarmótsnefndin óska gesti nr 1000 hjartanlega til hamingju með afrekið. Við auglýsum þá eftir gesti númer 1000 því þú hefur unnið til veglegra verðlauna:

Frítt í sund fyrir einn í Krossneslaug á Ströndum

Af fjárhúsagrindum og Ferðafélagsþrasi.

Thu, 13 Jul 2006 21:41:24 GMT

Nefndin hefur eftir þrotlausa báráttu um gólfefni í fjárhúsin á Valgeirsstöðum gefist upp. Harðar viðræður við Ferðafélagið stóðu yfir í gærdag en þá barst okkur yfirlýsing frá Ferðafélaginu þess efnis að “project - fjárhúsgólf á Valgeirsstöðum” yrði sett á verkefnalista og fjárhagsáætlun næsta árs.

Nefndarmenn vilja að skýrt komi fram að barist var fram í rauðan dauðan og öllum brögðum beitt í baráttunni um gólfið. Bauð m.a. formaður nefndarinnar Ferðafélaginu sálu sína í skiptum fyrir 60 fermetra en allt kom fyrir ekki. Engar framkvæmdir eru fyrirhugaðar á Valgeirsstöðum þetta árið og er því fyrirhuguð vinnuferð okkar öflugustu vinnuþjarka á Strandir hér með aflýst og gjöf okkar til Ferðaferðafélagsins afþökkuð. Hvað rollugrindurnar varðar þá er um ósköp sjarmerandi rekaviðsgrindur að ræða og gerum við ættarmótsnefndin okkar besta til að gera aðstöðuna sem best verður á kosið og það á fjárhúsavísu.

Óleyst verkefni

Sun, 02 Jul 2006 17:18:18 GMT

Er heim var komið af Ströndum var það fyrsta verkefni nefndarinnar að koma niðurstöðu ferðarinnar og tillögum að lausnum til æðstu manna ættarinnar. Góðar undirtektir fengust og þá sérstaklega frá systkinunum Gunnu og Gesti sem strax urðu mjög spennt fyrir verkefninu og hlakkaði til að fá að bretta upp ermarnar og taka til hendinni. Gestur í fjárhúsunum og Gunna í eldhúsinu. Var því ákveðið að hjóla í Ferðafélagið með eftirfarandi tillögu :

Ættin útvegar vinnuflokk skipaðan okkar harðduglegasta fólki til að fara norður á Valgeirsstaði og skipta út fjárhúsagrindum fyrir traustan gólfflöt og leysi þar með vandamál tengd sameiginlegu borðhaldi innandyra. Vinnuframlagið yrði þá einnig þakkargjöf okkar ættarinnar til Ferðafélagsins sem að svo rausnarlega bauð okkur frjálsan og frían aðgang að Valgeirsstöðum um ættarmótahelgina. Það eina sem Ferðafélagið þyrfti að gera væri að skaffa okkur efni og koma því á staðinn.

Páll Guðmundsson, framkvæmdastjóri Ferðafélagsins var mjög spenntur fyrir tillögunni og ætlaði að gera allt í sínu valdi til að hægt væri að fara út í framkvæmdir þótt ekki hefði verið gert ráð fyrir þessu í fjárhagsáætlun félagsins . Páli leyst það vel á framtakssemi fjölskyldunnar sem rætur á að rekja til Valgeirsstaða að hann bauð okkur að taka Valgeirsstaði í fóstur. Fósturhlutverkið fæli þá í sér að við yrðum þeir aðilar sem opnuðum húsið á vorin, sæjum um að ganga frá á haustin og dyttuðum að ef þess væri þörf. Um væri að ræða sjálfboðavinnu en ferðir á staðinn og uppihald greitt. Þannig að nú leggjum við boð Ferðafélagsins í ykkar hendur kæra fjölskylda og spyrjum : Er áhugi innan fjölskyldunnar á að taka Valgeirsstaði í fóstur eins og Páll orðaði það. Kannski eitthvað sem við getum velt fyrir okkur fram að ættarmóti ef Ferðafélagið veitir okkur það langan umhugsunarfrest en auðvelt væri að nálgast frekari upplýsingar um fósturhlutverkið ef áhugi blundar einhversstaðar þarna úti

Hvað varðar fyrirhugaða ferð vinnuþjarka á Strandir þá verður nánar fjallað um það í næstu færslu en þegar hafa nokkrir áhugasamir gefið sig fram.

Úttektar og samningardagur undanfara

Thu, 29 Jun 2006 12:55:57 GMT

Dagurinn rann upp sólríkur með heiðskíran Strandahiminn og eftir morgunsund var ferðinni heitið á Krossnes þar sem okkar beið rjúkandi hádegismatur – ljúffengur saltfiskur og grjónagrautur- Þótti öðrum undanfara -Elfari mikið til koma að matur stæði á borðum í hádeginu. Kvaðst hann þá ætla að skilja betri helming sinn eftir í sveitinni þannig að hún læra mætti góða siði. Hann þóttist þó vita að áður en langt um liði myndi það enda með að húsbóndinn Úlfar yrði komin á pottana og sagði að lokum að hann myndi ekki gefa neinum slíka hefndargjöf.

Ferðinni var svo heitið í Norðurfjörð þar sem að við höfðum mælt okkur mót við Laugu í Norðurfirði. Kvik á fæti fór svo Lauga með okkur um svæðið og sýndi okkur stolt nýsmíðar og nýjungar á staðnum sem er í alla staði til fyrirmyndar. Áhugi okkar beindist þó aðallega að fjárhúsunum en vitað var að skipt hafði verið út rollugrindum á hluta gólfsins. Leiddi lauga því okkur út í fjárhús og sýndi okkur nýlegar framkvæmdir en talsvert hefur verið unnið að endurbótum þar. Laugu þótti það miður að ekkert hefði verið unnið frekar að endurbótum í fjárhúsunum á vordögum en þarna gæti risið hinn glæsilegasti veislusalur fyrir okkur afkomendur Sveinbjörns og Rósu á komandi ættarmóti með lítilli fyrirhöfn hrausts og viljugs fólks. Lauga teymdi okkur svo kát og skrafandi um alla króka og kima útihúsanna og skýrði frá ætlunum Ferðafélagsins en sagði lítinn áhuga virðast vera innan raða Ferðafélagsmanna eins og væri og þætti henni það mjög miður. Lauga skaut því enn og aftur að okkur undanförum að mæta nú bara á staðinn með duglega vinnuþjarka og klára verkið. Það væri nú einnig gaman að því að skilja eitthvað eftir sig á staðnum sem ræturnar liggja. Sannfæringarkraftur og eldmóður Laugu var nú farinn að heilla okkur undanfara og vorum við farin að sjá salinn rísa fyrir framan augu okkar. Þetta væri kannski lausnin á eina vandamálinu sem upp hefur komið í tengslum við komandi ættarmóti : sameiginlegt borðhald innandyra og það á “ þúfunni” Valgeirsstöðum.

Full af eldmóð héldum við af staðnum og eftir yndislegan dag í sveitinni sem margt bar í skauti sér m.a. forvitnileg ökuferð þeirra Steinstúnsfeðga en Samúel sást þeytast um sveitina á traktor með Gulla í eftirdragi þar sem hann sat eldgamalt traktors-skrifli og mátti hafa sig allan við að halda sér á sætinu. Þeir feðgar veifuðu okkur undanförum er þeir þeyttust fram hjá okkur en gáfu sér ekki tíma til að staldra við og héldu áfram brjálæðislegri ökuferð sinni um sveitina eins og skrattinn væri á hælum þeirra - líklega með þeirri von að koma þeim gamla í gang. Ferðinni var svo í lok dags hraðað aftur í sundlaugarhúsið þar sem að Krossnesbúar voru væntanlegir í kvöldmat og endaði dagurinn með fjörugum samræðum við matarborðið þar sem boðið var upp á ýmsa framandi rétti m.a. kús-kús. Voru svo aðstoðarbeiðnir okkar undanfara bornar upp og tóku Krossnesbúar með eindæmum vel í allar óskir okkar og fannst ekkert sjálfssagðara en að aðstoða í hinum og þessum uppákomum á komandi ættarmóti. Hvað kús-kúsið varðaði þá þótti Úlfari kosturinn ljúffengur en furðulegur og taldi í fyrstu að um einhverskonar hrogn væri að ræða. Þeim krossnesbúum þótti máltíðin með eindæmum “öðruvísi” og skemmtileg og var mikið hlegið og skrafað þessa kvöldstund. En Krossnesfólk mátti svo hraða sér heim á bæ þar sem að síðasta ærin átti að bera þá um nóttina og viti menn í morgunsárið bar svo síðasta ærin á Krossnesi og var heimilisfólki mikið létt eins og gefur að skilja. Lýkur hér með sögu af ferð undanfara á Strandir en ekki þar með sagt að ekki séu fleiri fréttir að færa því að í farteskinu voru óleyst verkefni og verður fjallað um það í næstu færslu.

Áframhald á ferð undanfara á Strandir

Tue, 27 Jun 2006 21:58:46 GMT

Við vorum komin að Asparvík í síðustu færslu og þaðan að Árneshrepp var ferðin áfallalaus og án stórra tíðinda en undir Reykjaneshyrnu dró til tíðinda en þá römbuðu undanfarar á dauða tófu sem lá í vegkantinum. Tófufétið var að sjálfssögðu hirt þar sem að tilvalið þótti að færa heimamönnum tófuna að gjöf svo að auðvelda mætti samningarviðræður m.m. en leggja átti fyrir heimamenn ákveðna beiðni um aðstoð í tengslum við mótið okkar á Valgeirsstöðum. Vert að nefna að talsverð verðmæti liggja í tófuskotti en talið er að skottið liggi á um 7000 kr.

Rennt var í hlað á Krossnesi og nýkjörinn oddviti Árneshrepps, Oddný S Þórðardóttir – betur þekkt sem Systa á Krossnesi tekin á tal og henni afhent tófan í virðingar og vináttuskyni sem með bros á vör og full af kímni tók á móti gjöf okkar niðja Sveinbjörns og Rósu frá Norðurfirði. Það er kannski sér í lagi að óska dugnaðarforkinum Systu til hamingju með stöðuna og engin efi í huga að hún mun sinna hlutverkinu með sóma. Krossnesbúar þau Úlfar, Systa og Árni Geir tóku okkur fagnandi og hlökkuðu til að heyra af komandi ættarmóti en ferðalangar stöldruðu stutt við þar sem að á lá að komast í hið yndislega sundlaugarhús við Krossneslaug. Var þá degi tekið að halla, ekki það að birtan væri eitthvað að hverfa á þessum bjartasta tíma ársins, en ýmislegt á könnu ferðalanga enda Jónsmessunótt framundan og hvar ef ekki á Ströndum að maður gæti fylgst með selum afklæðast hömum sínum og dansa í fjöruborðinu eins og sagan hermir .

Undanfarar á Ströndum -Undirbúningur að ættarmóti í fullum gangi

Mon, 26 Jun 2006 23:17:53 GMT

Um Jónsmessuhelgina hélt undanfararhópur ættarmótanefndarinnar norður á Strandir. Tilgangurinn …. jú að taka út aðstöðuna á Valgeirsstöðum og þá fyrst og fremst til að taka út aðstöðuna í fjárhúsum staðarins en óljóst var hvort fjárhúsin rúmuðu sameiginlegt borðhald fjölskyldunnar á komandi ættarmóti.

Ferðinni mun nú lýst í smáatriðum og varpað verður ljósi á gangi mála en þar sem að mikið er að segja frá mun það tekið í köflum og er það vonandi til þess að kveikja áhuga skyldmenna á lifandi heimasíðu Sveinbjörns Valgeirssonar og undirbúningi mótsins. Dagur I. Lagt var af stað í björtu blíðskaparveðri og mikil tilhlökkun í undanförum enda sáu þeir framundan friðsældarhelgi þar sem að ekkert af börnum þeirra hafði tíma til að fylgja “undanförunum” eða foreldrum sínum Jóhönnu Heiði og Elfari norður á Strandir. Ferðin gekk vonum framar þar til við nálguðumst okkar uppáhalds vegarkafla “Balana” við heimaslóðir ömmu Rósu í Asparvík. Nú kannski rétt að skýra frá ástríðu annars undanfara þ.e. Jóhönnu Heiðurs á umræddum vegarkafla en hún hefur frá barnæsku verið einlægur aðdáandi villtra vega. Ástríðan hefur þá sér í lagi tengst “Bölunum” sem hafa þótt einstaklega villtir og torveldaðir yfirferðar. Jóhanna hefur þá um skeið verið sérlegur talsmaður - áhugamanna um vernd villtra vega – og gaf m.a. út yfirlýsingu til Strandamanna ekki alls fyrir löngu er kvartað var undan slæmum samgöngum að slæmir vegir væru sérkenni Stranda og friða ætti skemmtilegheitin og þá sérstaklega Balana. Nóg væri nú bara búið að skemma af skemmtilegum ófærðum undanfarin ár. Ekki skal viðbragða heimamanna getið hér til mergjar annara en þeirra að þeim þótti lítt um skoðanir “sunnanmanneskjunnar! Jæja nóg um það - við vorum sem sagt stödd á Bölunum og mikil tilhlökkun í að fara yfir ósköpin er við okkur blöstu stórar vinnuvélar og það ekki lítið af þeim. Ferðalöngum rann kalt vatn á milli skins og hörunds við ásýndina ! Var virkilega komið að því ! Var verið að skemma Balana ! Jú það koma á daginn að það er verið að leggja hraðbraut í gegnum Balana og þar með síðasta virkið fallið og síðasti virkilega skemmtilegi vegarkaflinn norður á Strandir liðinn undir lok. Það má þó vel vera að njóta megi villimennskunnar á einhverjum köflum þegar við förum norður í lok júlí en ég lofa ykkur engu. Framfarirnar hafa sinn gang og þar að auki virtust þetta harðduglegir menn sem voru þarna við störf og fóru þeir hratt yfir.

Með tárin í augunum héldum við för okkar áfram um sundurhoggin Balaveg en urðum þó að hverfa frá þunglyndinu sem yfir okkur féll við sjáanleg skemmdarverk þegar við rákum augun í mannskap niðri á Asparvíkur-eyrinni ! Þar voru líka einhverjar framkvæmdir í gangi ! Forvitnin helltist yfir okkur og skröltum við því niður slóðan að Asparvík…virkilega skemmtilegur slóði það annars….og þar hittum við fyrir Guðjón frá Dröngum ásamt fríðu föruneyti. Við spurðum Guðjón fregna og hann tjáði okkur að hann væri að endurbyggja hákarlahjall og væri langt komin með það en þarna hefði hákarlaverkun tíðkast síðan á 16. öld. Hann kvaðst þá hafa fengið ríkið til að styrkja framkvæmdina og einhvern veginn hvarflaði það að manni að Asparvíkurættaði frændi vor – alþingismaðurinn Jón Bjarnason -hefði nú átt einhverja milligöngu þar um en það er líka bara hið besta mál. Gaman alllavegana að sjá einhvern í Asparvík og nú stendur þar þessi prýðis – hákarlahjall sem gaman er að bera augum. Guðjón tjáði okkur einnig að einhver ættingi okkar úr Asparvíkurlegg ætlaði að reisa þarna sumarbústað innan skamms. Man þó ekki nafn hans.

Nú þykir mér nóg komið í bili enda mikið að melta - Balavegurinn að hverfa ! Fylgist með framhaldi ferðasögunnar og undirbúningi móts næstu daga hér á heimasíðunni.

Ættarmót 28-30 júlí 2006

Mon, 12 Jun 2006 01:37:48 GMT

Valgeirsstaðir á Ströndum

Hér ætlum við að halda ættarmót helgina 28 – 30 júlí 2006

Sæl veri fjölskyldan. Loksins er komið að því. Við sláum upp ættarmóti í tilefni af 100 ára afmæli forföður okkar Sveinbjörns Valgeirssonar en hann hefði orðið 100 ára þann 24.ágúst 2006. Staðsetning hefur verið valin og nefndarvinna löngu hafin að hálfu ættarmótsnefndarinnar en svona til upprifjunar þá var fyrirspurn send til Ferðafélags Íslands síðla árs 2005 þar sem þess var farið á leit að ættin fengi Valgeirsstaði til afnota síðustu helgina í júlí fyrir vægt gjald. Ítrekað var minnst á tengsl við staðinn og að sögu ættarinnar mætti rekja beint í þetta hús. Svar barst þá eiginlega um hæl frá Páli Guðmundssyni framkvæmdastjóra FÍ: “Það er okkur ánægjulegt að svara bréfi þínu þannig að þið getið, í ljósi tengsla ykkar við staðinn, fengið afahús, Valgeirsstaði að láni endurgjaldslaust þá helgi sem þið haldið ættarmótið. Þið segið okkur bara fljótlega hvað helgi þið ætlið í þetta og við tökum hana frá fyrir ykkur “

Í lok árs 2005 hófust svo störf ættarmótsnefndarinnar en hana skipa aðilar úr öllum greinum ættarinnar en það eru Jóhanna H. Gestsdóttir, Birna Júlíusdóttir, Valgarður L. Jónsson, Gyða Gunnarsdóttir, Lára Hlöðversdóttir og Gíslína Erlendsdóttir. Þessar gleðifréttir voru svo opinberaðar á árlegu jólaboði ættarinnar og hugleiðingar nefndarinnar kynntar í grófum dráttum við mikinn fögnuð viðstaddra. Nefndin hefur unnið ötullega að undirbúningi komandi móts og hefur nú brett upp ermarnar þannig að um munar. Er þá m.a. myndasöfnun á lokastigi og heimasíða Sveinbjörns Valgeirssonar klár til birtingar fyrir ættinni en hér er að finna myndasöfn, ágrip úr sögu Sveinbjörns Valgeirssonar, saga Valgeirstaða o.fl. Hér eru einnig áhugaverðir tenglar s.s. Fréttasíða Árneshrepps og Vestfjarðarvefurinn þar sem m.a. lesa má um vætti og tröll sýslunnar. Smellið á tenglana hér til vinstri til að fræðast um húsið og ættina og til að skoða nýjar og gamlar myndir úr albúmum systkinanna frá Norðurfirði. Störf nefndarinnar eru þó rétt að hefjast og er dagskrá mótsins í mótun og myndun en ætlunin er að birta dagskrána hér á heimasíðunni innan skamms. Það er einlægur ásetningur nefndarinnar að standa að skemmtilegu móti með skemmtidagskrá á heimsmælikvarða. Það mun ekki reynast erfitt að útbúa skemmtidagskrá í því töfrandi umhverfi sem við ætlum að dvelja í saman þessa helgi og síðan vill svo vel til að ættin er vel skipuð framúrskarandi söng og músíkfólki svo og öðru hæfileikaríku fólki sem að ekki getur beðið eftir að skemmta sér og sínum á komandi ættarmóti. Þannig að kæra fjölskylda – við getum ekki annað en beðið spennt eftir ættarmótinu sem óðum styttist í.

Undirbúum skemmtun, gleði og gaman fyrir heila helgi saman. Verið þið svo dugleg að láta í ykkur heyra og skrifið í gestabókina - Ættarmótsnefndin